Sektori i Karrierës Studentore dhe Alumnit, UNIKO vijon bashkëpunimin me stafet e mësuesve dhe këshilltarëve të karrierës në shkollat e mesme të qarkut tonë me qëllim informimin dhe njohjen nga afër të nxënësve me veprimtarinë akademike, infrastrukturore dhe studentore të Universitetit, duke i ndihmuar ata në orientimin drejt studimeve të larta.

 Nxënësit të shoqëruar edhe nga drejtues e mësues të shkollës së tyre u pritën fillimisht nga përgjegjësi i SKSA-së, dr. Romeo Terolli. Takimin e parë ata e zhvilluan në mjediset e Senatit Akademik, ku u takuan me rektorin, prof. dr. Lorenc Ekonomi dhe zëvendësrektorin për mësimin, prof. as. dr. Lorena Zeqo. Rektroi i njohu të rinjtë me veprimtarinë që zhvillon Universiteti “Fan S. Noli” në tërësi dhe në veçanti me veprimtarinë akademike e jashtëkurrikulare të studentëve.

Pasi vizituan mjediset e Rektoratit, ndalesat e radhës ishin fakultetet, ku stafi akademik i njohu me punën që zhvillohet në laboratorë, në qendrat e ngritura në kuadër projektesh, në auditorë, në biblioteka etj.

Krahas infrastrukturës, në këto takime të rinjtë treguan interes edhe për programet e studimit, mundësitë e zhvillimit profesional, diplomat e dyfishta, mundësitë për mobilitete që ofron universiteti në partneritet me universitetet e Bashkimit Evropian etj.

Veprimtari të tilla forcojnë lidhjet ndërmjet arsimit të mesëm dhe atij të lartë, duke nxitur ndërgjegjësimin e të rinjve për rëndësinë e përzgjedhjes së drejtë të karrierës dhe studimeve universitare.

Falënderojmë për këtë bashkëpunim të gjithë nxënësit e pranishëm, drejtoreshën e Shkollës së Mesme të Bashkuar “Dëshmorët e Pojskës”, znj. Ermira Ademaj, koordinatoren e edukimit për karrierën, znj. Denisa Bogdani dhe mësuesin e gjuhës shqipe në këtë shkollë, z. Arianit Isufi për gatishmërinë dhe mbështetjen.