23 tetor 2025- Përfshirja e studentëve të Universitetit “Fan S. Noli” në jetën sociale, kulturore dhe sportive të qytetit ishin në qendër të një takimi që u zhvillua nën frymën e bashkëpunimit mes Këshillit Studentor të Universitetit “Fan S. Noli”, Sektorit të Karrierës Studentore dhe Alumnit dhe Qendrës Rinore Korçë.
Takimi kishte në fokus gjetjen e hapësirave dhe krijimin e mundësive sa më të mira për angazhimin e studentëve të UNIKO në veprimtari të ndryshme që i përfshijnë ata në këto bashkëpunime.
Fjorela Bajraktari presidene e KS shprehu angazhimin e Këshillit dhe të studentëve për të marrë pjesë në nisma dhe veprimtari të përbashkëta me Qendrën Rinore, si dhe kërkoi mbështetje për realizimin e kalendarit vjetor të veprimtarive studentore.
Dr. Romeo Terolli, përgjegjës i Sektorit të Karrierës Studentore dhe Alumnit, përshëndeti nismën për angazhimin e palëve dhe ofroi mbështetjen e plotë të këtij sektori për veprimtaritë e përbashkëta. Ai gjithashtu shtroi idenë e nënshkrimit edhe të një marrëveshjeje bashkëpunimi ndërmjet palëve.
Nga ana tjetër, drejtuesi i Qendrës Rinore Korçë, z. Dejvi Hoxha u shpreh i gatishëm për të mbështetur Këshillin Studentor, ndërsa theksoi se Qendra është e hapur për nënshkrimin e marrëveshjes së bashkëpunimit. Ai tha se mjediset, logjistika dhe burimet njerëzore të Qendrës Rinore, do të jenë në dispozicion të zhvillimit të veprimtarive të përbashkëta.
