Në datën 8 nëntor 2024, Universiteti “Fan S. Noli” në bashkëpunim me Këshillin e Qarkut, Korçë organizuan në mjediset e Amfiteatrit të Fakultetit të Edukimit dhe Filologjisë konferencën shkencore: “80-Vjetori i Çlirimit, Shqiptarët dhe Koalicioni Antifashist”.
Punimet e seancës plenare i hapi pedagogu i departamentit të Historisë dhe Gjeografisë, phd. Metin Venxha, i cili përshëndeti të pranishmit përfaqësues të Këshillit të Qarkut, Korçë, institucioneve, komuniteteve fetare, studiues të historisë, staf e studentë të UNIKO, mësues e nxënës të shkollave të qytetit etj.
Punime të mbara i uruan kësaj konference, rektori, prof. dr. Lorenc Ekonomi, znj. Mimoza Shuli, zëvendëskryetare e Këshillit të Qarkut, Korçë; prof. as. dr. Jonela Spaho, dekane e FEF.
Më pas, konferenca i vijoi punimet në dy sesione paralele.
Sesioni I u drejtua nga prof. as. dr. Teki Kurti, i cili referoi temën: “Lufta antifashiste në Korçë sipas dokumentave gjermane”. Po gjithashtu, në këtë sesion referuan edhe phd. Jordan Jorgji me temën: “Sistemi ndërkombëtar dhe Lufta e Dytë Botërore në Shqipëri”, dr. Orjon Ago me “Kontributin e Zonës së Vakëfeve në Luftën e Dytë Botërore”, dr. Alba Kreka, e cila u ndal në kujtesën historike te të rinjtë në 80-vjetorin e çlirimit të vendit, me rast studimi qytetin e Korçës.
Sesioni I u përmbyll me referimin e mësueses së historië, znj. Ruela Ago me temën: “Të panjohurat e ngjarjeve të 8-9 shtatorit 1943 në Korçë”.
Sesion II vijoi nën drejtimin e prof. as. dr. Jonela Spaho, e cila njëkohësisht referoi edhe temën: “Letërsia shqiptare gjatë luftës së dytë Botërore”. Në këtë sesion, phd. Metin Venxha kumtoi: “Ideja dhe realizimi i Frontit Antifashist në Shqipëri gjatë Luftës së Dytë Botërore”.
Sesioni II vijoi me kumtesat e msc. Nuredin Nazarko dhe msc. Jorida Tollkuçi përkatësisht me temat: “Anamneza e Drejtuesit Politik të PKSH-së gjatë Luftës së Dytë Botërore” dhe “Dhora Leka: Muzika e rezistencës dhe roli i gruas në luftën për çlirim”. Porf. as. dr. Eris Rusi mbylli punimet e kësaj konference me temën: “Koha dhe Kujtesa në letërsisë e Dritëro Agollit: “Komisari Memo” mbi ngrehinat e Luftës së Dytë Botërore”.
