Në muajin mars 2025, studentët e Fakultetit të Bujqësisë, Seat Meto dhe Arbion Pertefllari morën pjesë në një trajnim me fokus shkëmbimin e njohurive dhe krijimin e biznesit të organizuar në Universitetin “Aldo Moro” të Barit, Itali në kuadër të projektit ILOFORDIGITAL – Interreg IPA South Adriatic 2021-2027, ku UNIKO është një nga institucionet partnere.
Trajnimi u fokusua në shkëmbimin e njohurive, krijimin e bizneseve të reja dhe transferimin e teknologjisë në tregun e punës. Gjatë këtyre tre ditëve, studentët tanë patën mundësinë të angazhohen në diskutime dhe ëorkshop-e me ekspertë të njohur në fushën e sipërmarrjes dhe inovacionit.
Në ditën e parë, morën pjesë në sesionet mbi rolet e universiteteve në zhvillimin e aftësive sipërmarrëse dhe dixhitale, ku u prezantuan strategjitë për tërheqjen e investitorëve dhe përkrahjen e startup-eve nga universitetet. Një ndër momentet më të rëndësishme ishte diskutimi mbi raportin e OECD-së “ITA.CON”, i cili trajton rëndësinë e bashkëpunimit midis universiteteve dhe shoqërisë për progresin ekonomik.
Në ditën e dytë, trajnimi u përqendrua në transferimin e teknologjisë dhe krijimin e biznesit, ku studentët eksploruan mënyrat për të shndërruar idetë e kërkimit shkencor në biznese të suksesshme. Ai patën mundësinë të punonin me Business Model Canvas, duke krijuar një model konkret për një ide biznesi të mundshme.
Në ditën e tretë, sesionet u përqendruan në mësimin përmes lojës dhe qasjen inovative për zhvillimin e aftësive strategjike, ku pjesëmarrësit morën pjesë në sfida dinamike që nxitën bashkëpunimin dhe kreativitetin. Sot Seat Meto e vlerëson këtë trajnim si një përvojë të jashtëzakonshme, e cila e ka ndihmuar të kuptojë më mirë rëndësinë e inovacionit, sipërmarrjes dhe bashkëpunimit ndërkombëtar.
Ata shprehen se njohuritë dhe aftësitë e fituara gjatë këtij trajnimi do të jenë thelbësore për zhvillimin e tyre akademik dhe profesional, duke i motivuar të aplikojnë konceptet e mësuara në projekte të ardhshme.
Pjesëmarrja në këtë trajnim konfirmon përkushtimin e Universitetit “Fan S. Noli” për të mbështetur studentët e tij në rrugën e ndërkombëtarizimit dhe zhvillimit profesional.
