Në datën 5 prill 2023 në Universitetin “Fan S. Noli” u zhvillua Olimpiada e Ekonomisë “Steve Jobs” me pjesëmarrjen e nxënësve të shkollave të mesme të Qarkut, Korçë.

Nxënësit e shkollave të mesme pjesëmarrës në këtë olimpiadë, fillimisht i përshëndeti dekania e Fakultetit të Ekonomisë, prof. as. dr. Ledina Alolli, e cila u shpreh se kjo është një nismë e ndërmarrë për herë të parë nga Fakulteti që ajo drejton me synimin për t`a kthyer në një traditë. Ajo tha se veprimtari të tilla jo vetëm që vënë në dukje aftësitë e nxënësve në fusha të caktuara, por ndihmojnë në zgjerimin edhe më tej të bashkëpunimit me nxënësit e shkollave të mesme, një pjesë e të cilëve do të jenë studentët ardhshëm të Universitetit “Fan S. Noli”.  

Pas vlerësimit të testeve, i cili këtë herë u bë me korrigjim të automatizuar nëpërmjet CleanScore u zhvillua ceremonia e ndarjes së çmimeve.

Me çmim të parë u vlerësua gjimnazi “Themistokli Gërmenji”, Korçë, me çmim të dytë u vlerësua gjimnazi “Skënderbeu”, Maliq dhe me çmim të tretë u vlerësua gjimnazi “Muharrem Çollaku”, Pogradec.