Në datën 9 qershor 2025 në mjediset e Universitetit “Fan S. Noli” u zhvillua panairi “Trashëgimia kulturore e pakicave etnike dhe linguistike në qarkun e Korçës”, në kuadër të projektit me të njëjtin titull.
Në takim morën pjesë përfaqësues të pakicave kombëtare maqedonase, rome dhe arumune, përfaqësues të pushtetit lokal, institucioneve, të stafit të UNIKO dhe studentë.
Të pranishmit i përshëndeti fillimisht rektori, prof. dr. Lorenc Ekonomi, i cili theksoi: “Ky panair etnografik është jo vetëm një ekspozim i pasurisë së trashëgimisë kulturore të komuniteteve në pakicë, por edhe një dëshmi e rolit që Universiteti ynë luan si urë lidhëse midis dijes akademike e realitetit kulturor e social që na rrethon”.
Më tej, takimin e përshëndetën edhe z. Erion Nexhipi, kryetar i Këshillit të Qarkut, Korçë mbështetës i këtij projekti, znj. Amanda Cici, drejtore Rajonale e Trashëgimisë Kulturore Korçë, prof. as. dr. Daniela Stoica, zëvendëskryetare e Senatit Akademik, UNIKO, z. Vasil Steriovski nga Shoqata Maqedonase “SONCE”, znj. Eva Tare nga Zyra Rajonale e Komisionerit për Mbrojtjen nga Diskriminimi dhe znj. Anida Zguri sipërmarrëse në promovimin e trashëgimisë kulturore të pakicave arumune, të cilët u ndalën në vlerat e veçanta që sjell ky projekt dhe kontributin që ai jep në evidentimin dhe promovimin e pasurisë kulturore.
Në fund të takimit studiuesja e çështjeve të pakicave kombëtare dhe e të drejtave të njeriut, dr. Maria Dojçe tha se projekti sjell të dhëna interesante në lidhje me këtë trashëgimi kulturore të pakicave në qarkun e Korçës, duke i hapur rrugë studimeve dhe kërkimeve të reja në këtë fushë. Më pas, ajo i ftoi pjesëmarrësit të vizitonin stendat e panairit etnografik të çelur në hollin e Rektoratit të UNIKO.
