Në datën 23 shtator 2025 në mjediset e Universiteit “Fan S. Noli” u zhvillua një takim në kuadër të projketit të READ “Plants, Language, and People: Knowledge and Practices to Meet Contemporary Challenges”.

Drejtuesja e projektit prof. as. dr. Anyla Saraçi i njohu fillimisht të pranishmit  me tre komponentët e këtij projekti: studimi i bimëve, roli i tyre në jetën e njerëzve, perceptimet e tyre rreth mjedisit dhe pasqyrimi i mjedisit në gjuhën dhe praktikat kulturore të një komuniteti.

Projekti është një bashkëpunim midis një grupi studiuesish të përbërë nga prof. dr. Robert Damo, Universiteti “Fan S. Noli”, mbledhës dhe studiues i shquar i resurseve gjenetike autoktone; prof. asc. dr. Ani Bajrami, Universiteti i Tiranës me një përvojë të shquar në antropologjinë gjuhësore, antropologjinë mjedisore dhe etnobotanikën dhe studiuesi i diasporës nga Universiteti i Bonit; prof. dr. Nazim Gruda me një përvojë dhe reputacion të padiskutueshëm në studimin e bimëve dhe zbulimin e praktikave të tyre të përdorimit dhe kultivimit.

I ftuar në takim rektori i UNIKO, prof. dr. Lorenc Ekonomi përshëndeti të pranishmit ndërsa theksoi edhe njëherë rëndësinë e projekteve READ, të cilët bëjnë të mundur lidhjen midis  shkencës në Shqipëri me atë të Diasporës, si dhe për bashkëpunimin e suksesshëm të AADF me Universitetin tonë.

Më pas, në takim u nënvizua se si një studim i njohurive dhe praktikave etnobotanike në zonë, pëpiqet të zbulojë marrëdhënien midis njerëzve dhe burimeve natyrore, duke mbështetur etnobotanikën, gjuhësinë, antropologjinë, ruajtjen e mjedisit, duke nxitur praktikat e qëndrueshme në ruajtjen e trashëgimisë kulturore dhe natyrore të rajonit.

Gjatë diskutimeve nga të pranishmit u theksua se përmes këtij projekti, studiuesit mund të përqendrohen në shtigje dhe mundësi të reja në programet e studimit dhe kërkimit në Universitetin “Fan S. Noli” dhe në të njëjtën kohë, duke ruajtur diversitetin biokulturor të zonës, mund të japin një kontribut modest në ndikimin ekonomik, social dhe kulturor në rajon.