Në datën 8 mars 2022, në Ditën Ndëkombëtare të Gruas, Universiteti “Fan S. Noli” zgjodhi ta përkujtojë ndryshe këtë ditë. Në shenjë solidariteti ai iu bashkua nismës “Këpucët e kuqe”, duke organizuar një veprimtari ndërgjegjësuese, e cila bëri bashkë pedagoge e studente të këtij Universiteti, si dhe gra e vajza të njohura të jetës publike në qytet, të cilat vendosën këpucët e tyre të kuqe në shkallët e Rektoratit, si një simbol i grave që kanë humbur jetën si pasojë e dhunës gjinore. Kjo nismë e përhapur në të gjithë botën e ka zanafillën te një artiste meksikane, e cila humbi motrën për shkak të dhunës në familje. Në këtë veprimtari u përcollën mesazhe shprese dhe kurajoje për të gjitha gratë dhe vajzat, të cilat përballen me vështirësi dhe sfida të ndryshme, ndërsa erdhën si modele të suksesshme disa prej grave dhe vajzave të këtij qyteti, të cilat ia kanë dalë të bëhen dikushi në jetë. Zëvendësrektori për shkencën dhe projektet, dr. Benita Stavre tha se këpucët e kuqe erdhën në Universitetin “Fan S. Noli” në shenjë solidariteti dhe me dëshirën për të bërë më të mirën. “Jemi këtu për t`u thënë grave dhe vajzave që ndodhen përballë vështirësish se ne jemi me to. Jemi këtu për t`u thënë studenteve se mund të arrijnë çka duan në jetë edhe pa e humbur dinjitetin e tyre. Jemi këtu për t`u dhënë emër të gjitha atyre grave që i kanë dhanë emër këtij Universiteti, këtij qyteti, këtij vendi. Të gjitha kanë qenë të nderuara, por edhe të paçmuara; kanë qenë ëndërrimtare, por edhe tokësore njëkohësisht; kanë qenë të vuajtura, por asnjëherë të pashpresa; kanë qenë të gjitha nënat, motrat, bashkëshortet dhe koleget e dikujt”.  Më pas, dekani i Fakultetit Ekonomik, prof. as. dr. Ledina Alolli u shpreh se të drejtat e grave janë në themel të kësaj dite. “Gratë dhe vajzat janë boshti i shoqërisë shqiptare që përbën gjysmën më të mirë të saj dhe garantimi i barazisë në këtë shoqëri, sigurisht që i jep zhvillim asaj. Me modelet, me vlerat që ne përcjellim në shoqërinë shqiptare të shohim përtej, duke qenë gjithmonë krah për krah njëra-tjetrës”.

Takimi vijoi me të tjera mesazhe ndërgjegjësuese për rëndësinë që ka kontributi i grave në shoqëri nga drejtorja e shkollës së mesme “Raqi Qirinxhi”, Korçë, znj. Keti Qirinxhi, pedagoget, dr. Maria Dojçe e Anjeza Vila, si dhe një përshëndetje e veçantë erdhi nga violinistja e talentuar, znj. Mirela Xheka.