Në datën 19 shtator 2023, në kuadër të bashkëpunimit ndërinstitucional rreth 30 doktorantë nga Universiteti St. Cyril and St. Methodius i Veliko Tarnovo-s, Bullgari erdhën në Universitetin “Fan S. Noli”.

Në takimin e zhvilluar në mjediset e Rektoratit, grupi i doktorantëve bullgarë u prit nga rektori, prof. dr. Dhimitri Bello, zëvendësrektori për shkencën dhe projektet, prof. as. dr. Benita Stavre dhe zëvendësrektori për mësimin dr. Arto Adili.

Rektori i njohu ata fillimisht me ofertën akademike të Universitetit “Fan S. Noli” ndërsa foli edhe për zgjerimin e bashkëpunimit akademik në nivel institucional. Ai u ndal edhe në organizimin e Akademisë Verore: “Ballkani në rrënjët e studimeve gjuhësore, letrare, historike dhe etnografike”, një sipërmarrje e përbashkët e Universitetit “Fan S. Noli”; Universitetit “St. Cyril and St. Methodius” i Veliko Tarnovo-s, Bullgari dhe Universitetit Aristoteli të Selanik-ut, Greqi.

Mirëseardhjen u ka uruar edhe zëvendësrektori për shkencën dhe projektet, prof. as. dr. Benita Stavre, e cila foli mbi mundësitë e bashkëpunimit kërkimor- akademik dhe njëkohësisht bëri edhe një prezantim të Buletinit Shkencor, si botim i Universitetit “Fan S. Noli” dhe të konferencave zyrtare vjetore të Universitetit tonë.

Gjatë këtij takimi u zhvillua edhe leksioni i hapur me temë: “Bullgarët në Shqipëri” mbajtur nga prof. as. Raqi Bello.  

Doktorantët nga Bullgaria vizituan më pas mjediset e Rektoratit, ndërsa vizitat dhe takimet në kampusin e Universitetit “Fan S. Noli” do të vijojn gjatë gjithë kësaj jave të qëndrimit të tyre në qytetin e Korçës.