Në takim, ku ishte e pranishme edhe dr. Aida Mosko, zëvendësrektor për shkencën dhe projektet u diskutua mbi mundësitë për zgjerimin e bashkëpunimit ndërkombëtar në niveli akademik dhe kërkimor. Rektori theksoi rëndësinë e forcimit të lidhjeve me universitetet turke dhe mundësitë që ofron ndërkombëtarizimi i kurrikulave dhe projekteve shkencore për studentët dhe akademikët e Universitetit “Fan S. Noli”.

Në këtë kuadër, u prezantua veprimtaria e përgjithshme e universitetit dhe zhvillimi i mundësive për angazhimin në projekte të përbashkëta, si dhe mundësitë për bashkëpunim në hulumtime shkencore. Diskutimet u përqendruan gjithashtu në hapjen e mundësive për shkëmbim akademik, mbështetje për realizimin e veprimtarive dhe projekteve të përbashkëta, si dhe në promovimin e programeve të ndërkombëtarizuara të studimeve.

Ky takim u vlerësua si një hap i rëndësishëm në forcimin e mëtejshëm të lidhjeve ndërkombëtare dhe krijimin e mundësive të reja për studentët dhe stafin akademik të Universitetit “Fan S. Noli”, duke kontribuar në rritjen e ndikimit dhe zhvillimin e tij në nivel ndërkombëtar.