Në datë 18 qershor 2026 gjatë një takimi të organizuar në mjediset e FSHNH, dr. Suela Dinellari (Ibraimllari) koordinatore e projketit dhe Msc. Viola Dolani, pjesë e grupit të punës prezantuan objektivat kryesorë, veprimtaritë që do të realizohen, si dhe përfitimet e pritura në përputhje me treguesit e përcaktuar të performancës në projktin “Nga analiza e nevojave në pilotim: një qasje ndërdisiplinore për shërbimet ndaj të moshuarve – Rast studimi Qarku i Korçës”.

Ideuar një vit më parë, ky projekt paraqitet në vazhdim të punës jo vetëm mbi përmirësimin e kurrikulës për programin “Shërbime Sociale”, por edhe në konsolidimin e marrëveshjeve ndërinstitucionale të departamentit me Këshillin e Qarkut të Korçës, Fondacionin Emanuel dhe Kryqin e Kuq, Dega Korçë, si dhe në ofrimin e ekspertizës shkencore në shërbim të komunitetit. Ky projekt sjell në vëmendje një nga sfidat më të mëdha të rajonit, që i referohet tranzicionit demografik dhe izolimit të moshës së tretë.

Në takim ishin të pranishëm staf akademik, përfaqësues nga Drejtoria e Shërbimeve Sociale të Bashkive të Qarkut të Korçës, OJF-ve, si dhe staf nga Sektori i Projekteve, Trajnimit Shkencor dhe Shërbimeve Terciare, UNIKO, të cilët u uruan suksese pedagogëve dhe studentëve pjesëmarrës në projekt, si dhe institucioneve të përfshira.

Gjatë diskutimeve u theksua rëndësia e projektit në adresimin e nevojave të moshës së tretë dhe në forcimin e bashkëpunimit ndërmjet universitetit, institucioneve vendore dhe organizatave të shoqërisë civile. Projekti pritet të kontribuojë në zhvillimin e modeleve inovative të shërbimeve sociale, duke mbështetur njëkohësisht kërkimin shkencor dhe përfshirjen aktive të studentëve në procese me ndikim të drejtpërdrejtë në komunitet.