Në datën 18 dhjetor 2024 u zhvillua analiza e të gjithë veprimtarisë për vitin akademik 2023-2024 e Fakultetit të Bujqësisë, Universiteti “Fan S. Noli” Korçë.
Të pranishëm në takim ishin stafi akademik dhe ndihmësakademik i këtij Fakulteti, si dhe rektori prof. dr. Lorenc Ekonomi.
Dekani i FB, prof. as. dr. Besnik Skënderasi paraqiti në detaje analizën e të gjithë veprimtarisë mësimore të këtij Fakulteti duke theksuar: “FB në të gjithë veprimtarinë e tij mësimore ka synuar që nëpërmjet programeve të studimit që ofron, të kontribuojë në rritjen e standardeve akademike e shkencore, si dhe në përgatitjen e specialistëve të aftë në të gjitha fushat, sipas programeve të studimit që ai ofron. Drejtimet kryesor të veprimtarisë mësimore gjatë vitit akademik 2023-2024 për autoritetet drejtuese dhe stafin akademik të Fakultetit të Bujqësisë kanë qenë konsolidimi i programeve egzistuese në të tre ciklet e studimit në funksion të zgjerimit të fushës së zgjedhjes për nevojat që paraqet tregu i punës në rajonin e Korçës dhe më gjerë, si dhe akreditimi i shtatë programeve të studimit. Stafi drejtues i Fakultetit dhe pedagogët e tij kanë punuar për përshtatjen e infrastrukturës didaktike e shkencore me kërkesat që na dalin për konsolidimin dhe përmirësimin cilësor të të gjitha programeve të studimit, në mënyrë që të rritet interesi i studentëve për të studiuar në këto programe që ofron Fakulteti ynë”.
Prof. Skënderasi u ndal gjithashtu edhe në realizimin e objektivave në fushën e mësimdhënies e të kërkimit shkencor, në procesin e akreditimit të programeve të studimit, në përforcimin e kurrikulave aktuale, në nxitjen e mëtejshme të kualifikimit të stafit akademik për marrjen e titujve dhe gradave shkencore, në studentët dhe punën për promovimin e programeve të studimit te të rinjtë, projektet, veprimtaritë e ndryshme etj.
Pas paraqitjes së analizës vjetore takimi vazhdoi me diskutime me drejtuesit e Universitetit dhe të Fakultetit për punën në vijim, duke vënë theksin në objektivat kryesore të FB për vitin akademik 2024-2025.
