Në datën 24 shkurt 2023, në Fakultetin e Edukimit dhe të Filologjisë, Universiteti “Fan S. Noli”, Korcë, u përurua libri “American Dream”–historia e jashtëzakonshme e Beqir Potkës nga ferri komunist drejt tokës së premtuar, i autorit Eris Rusi dhe botuar nga shtëpia botuese Toena.

Të pranishmit i përshëndeti fillimisht, duke i falënderuar për pjesëmarrjen autori i librit, pedagogu dhe njëherësh kryetari i klubit të shkrimtarëve “Bota e re”, Korçë, dr. Eris Rusi ndërsa më pas vlerësimet e tyre për librin dhanë edhe Rektori, prof. dr. Dhimitri Bello, Dekani I FEF, prof. as. dr. Jonela Spaho, prefekti i Qarkut, Korçë, z. Nertil Jole, si dhe miq e kolegë të tij.  

Në takim, ku ishin të pranishëm pedagogë e studentë të Universitetit “Fan S. Noli”, shkrimtarë, artistë miq e të afërm të autorit u theksua fakti se libri është i përqendruar tek ngjarjet kryesore të jetës së Beqir Potkës dhe nuk i takon vetëm familjes dhe të afërmve të tij, por përcjell mesazhe që janë të vlefshëm për çdo lexues që beson tek mundësitë për t’ia dalë mbanë në jetë.

Një përshëndetje krejt e veçantë në këtë promovim erdhi edhe nga aktorët e mirënjohur të skenës dhe ekranit shqiptar, Klaudeta e Petrika Riza, të cilët përcollën jo pak emocion me interpretimin e disa pjesëve nga libri dhe vargje të lirikut të madh Skënder Rusi.

Në fund të takmit rektori, prof. dr. Dhimitri Bello në emër të institucionit e vlerësoi z. Beqir Potka si mik i Universitetit me certifikatë vlerësimi me këtë motivacion: “Për kontributin historik, si pjesë e komunitetit shqiptaro-amerikan  në Amerikë që përmbushi amanetin e Faik Konicës për t`u prehur përgjithmonë në atdhe dhe për ruajtjen e vlerave kulturore të vendit tonë në Shtetet e Bashkuara të Amerikës”.