Në datën 10 prill 2025 në mjediset e Bibliotekës së Fakultetit të Edukimit dhe Filologjisë u zhvillua seminari shkencor me temë: “100 vjetori i Revolucionit të Qershorit sipas të përkohshmeve “Gazeta e Korçës” dhe “Shqiptari i Amerikës” (qershor-dhjetor 1924) i organizuar nga departamenti i Histori-Gjeografisë.

Takimin e përshëndeti rektori i UNIKO, prof. dr. Lorenc Ekonomi, i cili përgëzoi Departamentin për tematikat e zgjedhura në veprimtaritë që organizon ashtu si ky seminar shkencor që, gjithashtu përkon edhe me 60-vjetorin e vdekjes së personalitetit të gjithanshëm, Fan Nolit, emrin e të cilit mban Universiteti ynë.

Punime të mbara uroi në këtë takim, ku ishin të pranishëm pedagogë, studentë e alumni, si dhe studiues të historisë edhe përgjegjësja e Departamentit, prof. as. dr. Edlira Menkshi.

Seminari vijoi me prezantimin e punimeve shkencore: “Neutraliteti i Korçës gjatë Revolucionit të Qershorit” nga phd. Metin Venxha dhe “Vizitat e Nolit në Korçë dhe impakti i tyre në jetën social-politike” nga dr. Orion Ago, në të cilat figura e Nolit shfaqet e parë nga këndvështrimi se si e ka trajtuar shtypi i kohës veprimtarinë e tij.

Të pranishmit vazhduan me pyetje e diskutime, duke u ndalur në momentë të veçanta historike rreth temës bosht të këtij seminari shkencor.