Në datën 25 mars 2025 në qytetet e Korçës dhe Pogradecit u zhvillua panairi “Work & Study” 2025, duke ofruar një mundësi shumë të mirë për informimin mbi arsimin e lartë dhe tregun e punës.

Universiteti “Fan S. Noli” në të dy stendat e tij kishte të pranishëm staf akademik dhe ndihmësakademik, të cilët i informuan maturantët mbi ofertën akademike, kriteret e pranimit, tarifat e shkollimit, mbështetjen me bursa etj..

Gjithashtu, në takimet me maturantët u theksua rëndësia e programeve të shkëmbimit Erasmus+ me universitete të njohura evropiane. Këto programe u japin studentëve mundësinë të studiojnë jashtë vendit dhe të zhvillojnë aftësitë e tyre, si dhe të krijojnë një rrjet të gjerë profesional.

Maturantët treguan interes të veçantë për fushat e studimit që ofron Universiteti ynë, infrastrukturën, qasjen bashkëkohore në mësimdhënie si dhe mbështetjen e ofruar për praktikat profesionale dhe mundësitë e punësimit pas diplomimit.

Pjesëmarrja e UNIKO në këtë panair konfirmon angazhimin e tij për të ndihmuar të rinjtë në zgjedhjet e tyre akademike dhe profesionale, duke ofruar një arsim cilësor dhe mundësi të shumta për zhvillim personal dhe profesional.