Në datën 17 dhjetor 2024 u promovua libri “Një histori e përmbledhur e Greqisë”, përkthyer nga akademiku britanik Richard Clogg.

Në mjediset e Bibliotekës “Thimi Mitko” ishin të pranishëm edhe drejtues e staf akademik i UNIKO, autoritete lokale, studentë e të ftuar të tjerë.

Takimin e hapi prof. as. dr. Jonela Spaho dekane e Fakultetit të Edukimit dhe Filologjisë,  e cila paraqiti një përmbledhje të jetës dhe karrierës së autorit Richard Clogg, si dhe vuri në dukje kontributin e tij në fushën e studimeve historike.

Presidenti i AIIS, dr. Albert Rakipi u ndal më pas në disa aspekte të rëndësishme të marrëdhënieve shqiptaro-greke,  duke vënë në dukje kontributin që ofron ky libër në njohjen e historisë së Greqisë nga diplomatët, studentët dhe lexuesit shqiptarë.

Edhe Ambasadorja e Greqisë në Shqipëri, znj. Konstantina Kamitsi e pranishme në këtë promovim vlerësoi përkthimin e sjellë nga autorit Clogg dhe të realizuar nga AIIS dhe  vuri në dukje lidhjet e forta që ekzistojnë mes dy vendeve dhe popujve tanë, duke shprehur mbështetjen e Greqisë për integrimin e Shqipërisë në Bashkimin Evropian.

Më pas, pedagogu i UNIKO, phd. Jordan Jorgji bëri një analizë të detajuar të  kapitujve të librit, të cilat përbëjnë edhe etapat kryesore të historisë së Greqisë gjatë periudhës 1770 e deri në çështjet aktuale të ditëve të sotme.

Takimi erdhi si një bashkorganizim i Albanian Institute for International Studies (AIIS), Ambasadës së Greqisë në Shqipëri, Universitetit “Fan S. Noli” dhe Bibliotekës “Thimi Mitko” të qytetit të Korçës.