AKKSHI – Thirrje për aplikim për projekte kombëtare të kërkimit dhe të zhvillimit (PKKSH) për vitin 2022

Drejtues i projektit: Dr. Alba Kreka

Fakulteti i Edukimit dhe Filologjisë/ Departamenti i Histori-Gjeografisë

Përshkrimi i projektit:

Ky projekt synon të bëjë bashkë dy institucione të rëndësishme si Universitetin “Fan S. Noli” dhe Bibliotekën Publike “Thimi Mitko” në një bashkëpunim ndërinsitucional për të bërë të prekshëm fondin e artë të albanologjisë, i cili konsiderohet jo vetëm një pasuri e madhe për qytetin e Korçës, por edhe një vlerë e paçmueshme e trashëgimisë sonë kombëtare. Duke evidentuar dhe hulumtuar pasurinë e rallë të Fondit Albanologjik nga studiues dhe profesionistë të fushës, ai bëhet i prekshëm nga të gjithë të interesuarit, madje lehtësisht mund të bëhet pjesë e strukturave të teknologjisë informatike të institucionit të bibliotekës.

Objektivat e projektit:

1. Hulumtimi, skedimi dhe evidentimi i Fondit Albanologjik të Bibliotekës Publike “Thimi Mitko” me qëllim nxjerrjen në pah të vlerave të ekzemplarëve të këtij katalogu.
2. Mbrojtja dhe ruajtja e trashëgimisë kulturore të disa prej botimeve/kolanave të BTTHM.
3. Ekspozitë e antikuarëve, botimeve në një kopje, periodikëve para vitit 1994.
4. Krijimi i një Biblografie të fondit Alabanologjik të BPTHM.

AKKSHI – Thirrje për aplikim për projekte kombëtare të kërkimit dhe të zhvillimit (PKKSH) për periudhën 2021-2023

Drejtues i projektit: Dr. Erinda Papa

Fakulteti i Edukimit dhe Filologjisë/ Departamenti i Gjuhëve të Huaja

Përshkrim i projektit

Ky projekt synon grupin e mësuesve të gjuhëve të huaja, të cilët do të kualifikohen me kompetencën digjitale; grupin e programuesve të aftë për dizajnin e kurseve të veçanta të gjuhëve të huaja të diktuara nga nevojat e tregut, grupin e specialistëve, të cilët punojnë në institucionet mbështetëse arsimore dhe që janë përgjegjës për hartimin ose zbatimin e politikave që synojnë edukimin digjital, si dhe grupin e komunitetit të interesuar për ndjekjen e kurseve të gjuhëve të huaja për qëllime specifike. Të kualifikuarit nga kjo qendër, do të jenë në gjendje të zhvillojnë teknologji të reja për përdorim në institucionet arsimore dhe në programe të formimit të vazhdueshëm, si dhe të përfshihen në krijimin e mjediseve inovative të të mësuarit. Në përfundim të ciklit të trajnimit, të interesuarit do të pajisen me një dëshmi të ndjekjes së kursit për mbrojtjen e gjuhës apo për trajnime specifike.

Trajnimet e ofruara përmes këtij laboratori do t’u shpalosin mësuesve të ardhshëm, profesionistëve jo-mësimdhënës dhe institucioneve mbështetëse arsimore, udhëzimet e nevojshme në përdorimin e teknologjive për t’i ndihmuar ata t’i përdorin sipas fushave të interesit. Në këtë mënyrë ne nuk synojmë të hedhim në një treg “të mbingopur” specialistë të tjerë të fushave të edukimit, por synojmë të kualifikojmë mësues të gjuhëve të huaja me kompetencën digjitale për të përballuar sfida të ndryshme. Ne i drejtohemi grupit të individëve me shpirtin e sipërmarrjes, me një interes të veçantë në fushën e programimit, të interesuar për të dizenjuar module apo lëndë të veçanta të gjuhëve të huaja dhe për të realizuar shpërndarjen e tyre online.

Po kështu nëpërmjet këtij projekti do të bëhet i mundur ristrukturimi i Laboratorit të gjuhëve të huaja dhe shndërrimi i tij në një mjedis virtual të të nxëni gjë që do të rriste mundësitë e bashkëpunimit me institucione të tjera në rajon, duke përmbushur në këtë mënyrë një nga objektivat strategjikë të përmendur në“Planin Strategjik të Zhvillimit të UNIKO (2021-2025)” në lidhje me ndërkombëtarizimin dhe rajonalizimin. Praktikat profesionale, laboratorët dhe çdo veprimtari tjetër mësimore-praktike do të mund të realizohet nëpërmjet shfrytëzimit të klasave virtuale dhe softuere-ve që ky laborator do të ketë në përdorim. Kjo përvojë e re do të rritë kapacitetet, si njerëzore dhe infrastrukturore, por njëkohësisht do të materializojë interesin e studentëve të gjuhëve të huaja për t’i kthyer vitet e studimeve universitare në një përvojë mbresëlënëse për vitet që do të vijnë. Projekti është planifikuar sipas komponentëve të mëposhtëm:

WP1 Identifikimi qendrave të ngjashme dhe vlerësimi i nevojave në fushën e edukimit digjital

WP2 Hartimi i programit të trajnimit dhe kualifikimit

WP3 Ngritja e kapaciteteve njerëzore dhe infrastrukturore dhe zhvillimi i materialeve të trajnimit

WP4 Miratimi i Programit të trajnimit dhe kualifikimit

WP5 Sigurimi i cilësisë dhe monitorimi

AKKSHI/ Thirrje për aplikim për projekte të infrastrukturës së kërkimit shkencor (PIKSH) për vitin 2021

Drejtues i projektit: Dr. Arto Adili

Rektorati/ Biblioteka Shkencore

Kohëzgjatja e projektit: 12 muaj

Ky projekt synon përmirësimin e infrastrukturës në funksion të kërkimit shkencor, konkretisht për digjitalizimin e fondit të Bibliotekës së Universitetit, përkatësisht një bibliotekë shkencore dhe 4 biblioteka të fakulteteve-Fakultetit të Edukimit dhe Filologjisë, Fakultetit të Ekonomisë, Fakultetit të Shkencave Natyrore dhe Shkencave Humane, Fakultetit të Bujqësisë, duke krijuar fillimisht skedarët elektronikë, duke krijuar një motor kërkimi të digjitalizuar për fondin, e më pas duke digjitalizuar materialin e plotë hardcopy.

Kjo infrastrukturë do të vihet në dispozicion të kërkuesve dhe studentëve duke lehtësuar punët e tyre në kërkimet shkencore, e veçanërisht për studimet e tyre doktorale, punimet e diplomës, kërkim të thelluar në kuadër të promovimit të titujve dhe gradave, etj. Për të realizuar digjitalizimin e fondit të bibliotekës do të krijohet një platformë e brendshme e bibliotekës. Synimi është që prirja e përgjithshme drejt digjitalizimit të sistemeve arsimore nëpërmjet Bibliotekës Digjitale të mundësojë:

• sigurimin e një ndërfaqeje miqësore për përdoruesit;
• përftimin e lehtësirave që ofron rrjeti nga përdoruesi;
• mbështetjen e funksioneve të bibliotekës duke i lehtësuar ato si për përdoruesit edhe për stafin që punon në to;
• ndihmesën në rritjen e kërkimit të avancuar, aksesin dhe marrjen e informacionit;
• përmirësimin e veprimtaritë e bibliotekës duke u mundësuar kërkuesve të kryejnë kërkime që nuk janë praktike manualisht;
• mbrojtjen e të dhënave në një mënyrë më të sigurt përmes digjitalizmit të dorëshkrimeve dhe materialeve unike.

Në këtë drejtim, UNIKO, duke e konsideruar bibliotekën elektronike edhe si një vlerë të shtuar për institucionin, ndjen nevojën që të përmirësojë dhe të modernizojë infrastrukturën kërkimore për studiuesit (staf dhe lexues të specializuar) si edhe studentët duke e parë këtë si domosdoshmëri për të lehtësuar mundësitë e tyre për kërkim dhe si një formë nxitjeje për më tepër iniciativa të reja në kërkim shkencor. Kjo do të ndihmojë veçanërisht pedagogët që janë në procesin e kryerjes së studimeve të tyre doktorale, të cilët do të ndihmohen nga platforma e bibliotekës shkencore për studimet e tyre. Projekti synon edhe dixhitimin e “Fondit Nolian”, i cili është pjesë e bibliotekës shkencore të Universitetit. Ky fond iu dhurua para pesë vitesh Universitetit “Fan S. Noli” nga Prof. Nasho Jorgaqi dhe qëllimi ynë është skanimi dhe skedimi i këtij fondi unik deri më tani në dispozicion vetëm të Universitetit “Fan S. Noli”, në mënyrë që t’u vihet lehtësisht në dispozicion të gjithë përdoruesve të interesuar.

Përveç kësaj, Universiteti “Fan S. Noli” duke vlerësuar partnerët e tij dhe bashkëpunimet ose aktivitetet e mira bashkëpunuese që ka pasur gjithmonë me partnerët, synon që bibliotekën e digjitalizuar të Universitetit ta vendosë në dispozicion edhe të të gjitha universiteteve në Shqipëri dhe Kosovë me të cilat ka marrëveshje bashkëpunimi, në mënyrë që edhe stafi akademik dhe studentët e universiteteve të tjera të kenë mundësinë të përdorin fondin e kësaj biblioteke në ndihmë të studimeve të tyre kërkimore.

Universiteti “Fan S. Noli” parashikon edhe dhënien e aksesit, përmes një account-i edhe Bibliotekës së Qytetit “Thimi Mitko”, duke vlerësuar edhe marrëveshjen e bashkëpunimit që ka nënshkruar me këtë të fundit, si dhe ish-studentëve të saj, pjesë e trajnimeve të strukturave të të nxënit gjatë gjithë jetës.

Qëllimi dhe objektivat e projektit

Projekti ka për qëllim kryesor digjitalizimin e fondit të Bibliotekës së Universitetit “Fan S. Noli”, nëpërmjet krijimit të një platforme skedarizimi, kërkimi dhe skanimi të materialeve që disponon kjo bibliotekë.

Objektivat e projektit

• Krijimi i fondit elektronik të bibliotekës së universitetit;
• Skedarizimi dhe krijimi i një motori praktik kërkimi;
• Ruajta e kopjeve unike të fondit të Bibliotekës në përgjithësi dhe kopjet unike të Fondit Nolian, në veçanti;
• Përditësimi i mjeteve të teknologjisë së informacionit në të mirë të kërkimit shkencor;
• Rritja e aksesit të lexuesve të specializuar në fondin aktual të bibliotekës;
• Konkretizimi i bashkëpunimit mes UNIKO dhe IAL të tjera në rang mbarëkombëtar dhe rritja e bashkëpunimit me Bibliotkën “Thimi Mitko”, Korçë.
• Vënia e fondit të Bibliotëkës në dispozicion të alumni dhe përmirësimi i shërbimeve të formimit të vazhduar në UNIKO.