Në datën 29 janar 2025 u mblodh Parlamenti i Studentëve i thirrur nga Këshilli Studentor i Universitetit “Fan S. Noli”.

Në takim u trajtuan disa çështje të rendit të ditës, si dhe kalendari i veprimtarive për vitin akademik 2024-2025.

Takimi u karakterizua nga një atmosferë dinamike dhe biseda konstruktive, ku të rinjtë patën mundësinë të shprehin pikëpamjet dhe propozimet e tyre rreth politikave rinore dhe atyre sociale.

Një hapësirë e veçantë gjatë mbledhjes iu kushtua takimit me tre studentet e Fakultetit të Ekonomisë, të cilat ndanë me bashkëmoshatarët përvojën e tyre të veçantë gjatë vizitës në Universitetin e Orleonit, Francë në kuadër të programit Erasmus+.

Studentet Denada Ramo, Gabriela Foto dhe Klerisa Lako treguan se si i ka ndihmuar kjo përvojë jo vetëm në aspektin akademik, por edhe në zhvillimin e aftësive të tyre ndërkulturore dhe profesionale.

Sipas presidentes së Këshillit Studentor të UNIKO, Fjorela Bajraktari ky bashkëbisedim rrit ndërgjegjësimin dhe informimin mbi mundësitë që ofron për studentët ky program, duke shprehur rëndësinë që kanë këto takime për promovimin e mundësive që ofrohen për studentët e UNIKO.