Në datën 21 nëntor 2024 në kuadër të Ditës së Sipërmarrjes, në mjediset e Fakultetit të Ekonomisë u zhvillua një takim i bashkëorganizuar nga Bashkia Korçë dhe Universiteti “Fan S. Noli”.
Të pranishëm ishin studentë e pedagogë të UNIKO, dekania e Fakultetit të Ekonomisë prof. as. dr Ledina Alolli, specialisti i Qendrës së Karrierës dhe Alumnit dr. Romeo Terolli, z. Joan Deli, Këshilltari për Rininë pranë Kabinetit të Kryetarit të Bashkisë Korçë, specialistja e sektorit të teknologjisë dhe informacionit, znj. Ina Cini, të cilët diskutuan rreth nismës për mbështjetjen e start up-ve përmes financimeve direkte nga palët e treta, si një hap i rëndësishëm drejt zhvillimit ekonomik dhe social të të rinjve në Bashkinë Korçë.
Gjatë takimit u theksua se synimi kryesor është pajisja e të rinjve me mjete dhe informacion që do t’i ndihmojnë të zhvillojnë aftësitë e tyre dhe të eksplorojnë potencialin e plotë për t’u bërë sipërmarrës të suksesshëm.
Përmes këtij programi, të rinjtë do të kenë mundësinë të marrin trajnime praktike dhe teorike mbi temat kryesore të sipërmarrjes, siç janë: Identifikimi i mundësive të reja ekonomike dhe tregtare në rajonin e Korçës, Hartimi i planeve të qëndrueshme të biznesit, Menaxhimi efektiv i burimeve dhe financave, Ndërtimi i rrjeteve profesionale dhe bashkëpunimi me aktorë të ndryshëm të tregut etj.
Nismat e reja do të mbështeten me mentorim nga ekspertë dhe sipërmarrës me përvojë, të cilët do të ndajnë njohuritë dhe sfidat e tyre për të ndihmuar pjesëmarrësit të shmangin pengesat e zakonshme dhe të përmirësojnë qasjen e tyre në treg.
Deli u tha studentëve se ky projekt është krijuar për të nxitur kreativitetin dhe inovacionin mes të rinjve, duke u ofruar mjete praktike që do t’i ndihmojnë të ndërtojnë biznese të qëndrueshme që kontribuojnë në zhvillimin e komunitetit dhe ekonomisë lokale.
