Në datat 1-2 prill 2025 u zhvillua në Fakultetin e Bujqësisë, Universiteti “Fan S. Noli” një cikël leksionesh të hapura nga pedagogu Luis Felipe Correa Letelier i Estonian University of Life Sciences. Ai mbajti me studentë të programit “Menaxhim Veterinar”, UNIKO, nxënës të Shkollës Profesionale Shërbime Korçë (drejtimi veterinari), veterinerë zyrtarë dhe privatë dhe të apasionuarve pas hipizmit temat: “Qasja ndaj kalit me kolikë: Menaxhimi mjekësor dhe kirurgjikal” dhe “Menaxhimi i plagëve të kalit” të cilat u trajtuan në ditën e parë ndërsa në ditën e dytë u trajtuan temat: “Menaxhimi i plagëve të kalit: Stabilizimi dhe menaxhimi i frakturave në fushë” dhe “Karakteristikat klinike të tetanozit te kuajt; Sinusiti tek kali”.

Në ditën e dytë krahas leksionit të hapur, prof. Luis Felipe i shoqëruar nga stafi i UNIKO vizitoi edhe “Shtëpinë e Kuajve” një qendër hipizmi në qytetin e Korçës, ku ndodhen rreth 40 kuaj racash për kompeticione dhe agroturizëm.

Ai ndau me stafin e pranishëm të kësaj “shtëpie” ekpertizën e tij dhe Universiteti në këtë kuadër zgjeron bashkëpunimin duke përmbushur edhe objektivin terciar të tij që është shërbimi ndaj të tretëve.

Pedagogu Luis Felipe Correa Letelier nga Estonian University of Life Sciences ishte në Universitetin “Fan S. Noli” në kuadër të programit Erasmus + duke e çuar në një tjetër nivel bashkëpunimin ndërinstitucional dhe procesin e ndërkombëtarizimit të Universitetit tonë.