Në datën 4 prill 2025 departamenti i Historisë dhe i Gjeografisë, Universiteti “Fan S. Noli”, organizoi workshopin me temë “Mësimdhënia e historisë dhe gjeografisë: Sfidat e sotme dhe drejtimet e së ardhmes”, ku morën pjesë mësues të profilit të Historisë dhe të Gjeografisë në arsimin parauniversitar (mësuesit e gjimnazeve dhe shkollave nëntëvjeçare) në qarkun e Korçës.

Takimin e hapi përgjegjësja e këtij Departamenti prof. as. dr. Edlira Menkshi, e cila tha se qëllimi është rritja e rolit të historisë dhe gjeografisë në formimin profesional dhe qytetar të nxënësve nëpërmjet përmirësimit në kurrikulën e arsimit.

Më pas të pranishmit diskutuan çështje të tilla, si: vendi që zë sot historia dhe gjeografia në kurrikulën e arsimit; metodologjitë bashkëkohore në mësimdhënien e historisë dhe gjeografisë dhe përdorimi i tyre në këtë proces; ritja e rolit të mësuesit të këtyre dy lëndëve në procesin  e mësimdhënies dhe transmetimit të njohurive; trajtimi i çështjeve të historisë dhe gjeografisë në disiplinat e tjera; sfidat me të cilat përballen sot mësuesit e historisë dhe gjeografisë në zbatimin e kurrikulës dhe në procesin e mësimdhënies etj.

Në takim u ra dakord që tryeza të tilla diskutimi të vijojnë edhe në të ardhmen, si ajo që do të organizohet së shpejti me nxënës të arsimit parauniveristar.

Këto takime zgjerojnë dhe thellojnë edhe më tej bashkëpunimin e Universitetit tonë me shkollat e arsimit parauniveristar, duke nxitur interesin e duke i ofruar më tepër maturantët me Universitetin.