Në datat 6-7 dhjetor 2024 në mjediset e Universitetit “Fan S. Noli” zhvilloi punimet konferenca shkencore me temë “Korça nga Lufta e Parë Botërore në Vetëqeverisje” në përkujtim të 110-vjetorit të fillimit të Luftës së Parë Botërore dhe 108-vjetorit të Vetëqeverimit të Korçës, konferencë e bashkorganizuar me Këshillin e Qarkut Korçë.
Seanca plenare u hap nga pedagogu, phd. Metin Venxha.
Më pas, duke i uruar punime të mbara kësaj konference, përshëndetën pjesëmarrësit rektori i UNIKO, prof. dr. Lorenc Ekonomi, kryetari i Këshillit të Qarkut Korçë, z. Erion Nexhipi, prof. as. dr. Jonela Spaho, dekan i Fakultetit të Edukimit dhe Filologjisë, prof. as. dr. Arsim Sinani, Universiteti i Prishtinës etj.
Konferenca shkencore trajtoi tema në kontekstin e zhvillimeve politike, ekonomike, kulturore dhe fetare në Krahinën Autonome të Korçës, kumtesa të cilat u ,mbajtën nga u mbajtën nga akademikë të Akademisë së Shkencave, profesorë të universiteteve nga brenda dhe jashtë Shqipërisë, studiues etj.
Në seancë plenare referuese kryesore ishte prof. dr Valentina Duka, me temën: “Korça në kontekstin e zhvillimeve politike gjatë Luftës së Parë Botërore”.
Në konferencë u referuan rreth 25 kumtesa nga 32 autorë, ndërsa në një ditë të veçantë si kjo kryetari I këshillit të Qarkut Korçë z. Erion Nexhipi i dorëzoi pasardhësit të familjes Kota, dy Çertifikata të Dëshmorit të Atdheut akorduar nga Ministria e Mbrojtjes, për dëshmorët Odhise Nikolla Kota (1880-1911) dhe Nikolla Aleksandër Kota(1858-1914).
Në datën 7 dhjetor konferenca i vijoi punimet në tri sesione paralele në mjediset e Rektoratit.
