Në datën 7 shkurt 2025 në mjediset e  Fakultetit të Shkencave Natyrore dhe Shkencave Humane u zhvillua një tryezë diskutimi me temë: “Forcimi i demokracisë përmes angazhimit të qytetarëve dhe demokratizimit të brendshëm të partive politike”.

Takimin e përshëndeti në emër të Universitetit “Fan S. Noli” zëvendësrektorja për shkencën dhe projektet, dr. Aida Mosko, z. Arjan Dyrmishi, Drejtor Ekzekutiv, Qendra për Studimin e Demokracisë dhe Qeverisjes; znj. Asli Cetinel, zëvendësambasadore, Ambasada e Hollandës në Shqipëri dhe znj. Valbona Kuko, Drejtore për Shqipërinë, Fondacioni Westminster për Demokraci.

Tema e Panelit I ishte “Demokracia e brendshme dhe transparenca e partive politike si mjete të forcimit të integritetit politik dhe qeverisjes” dhe tema e panelit II ishte “Roli i shoqërisë civile dhe akademisë në procesin e anëtarësimit në BE dhe demokratizimit të vendit”.

Projekti “Nxitja e dialogut publik dhe përfshirjes qytetare për të garantuar llogaridhënien e partive politike dhe integritetin e zgjedhjeve”, zbatuar nga CSDG, Forumi i Mendimit të Lirë dhe New Policy Group, me mbështetjen e Fondacionit Westminster për Demokraci, është një përpjekje për të krijuar një platformë diskutimi ndërmjet aktorëve të rëndësishëm shoqërorë.

Ky aktivitet u zhvillua gjithashtu në kuadër të Muajit të Angazhimit të Shoqërisë Civile për Bashkimin Europian, duke shërbyer si një shtysë për të rritur ndërgjegjësimin mbi standardet demokratike në Shqipëri. Rekomandimet e BE-së për Shqipërinë në raportin e vitit 2024 nënvizojnë rëndësinë e një demokracie funksionale, që fillon me rregullat dhe proceset brenda partive politike.