Fakulteti i Edukimit dhe Filologjisë, Departamenti i Gjuhës dhe i Letërsisë, organizoi një bashkëbisedim me gazetarin dhe studiuesin Ilir Ikonomi, autor i veprave “Fan Noli: Apostulli” dhe “Fan Noli: Rebeli”.
Të pranishëm ishin akademikë, studentë dhe studiues të historisë dhe letërsisë, etj.
Takimin e hapi përgjegjësi i departamentit të Gjuhës dhe Letërsisë, prof. as. dr. Eris Rusi, i cili tha se sot Fan Noli vjen në tempullin e dijes, që mban emrin e tij.
Këtë takim e përshëndeti edhe rektori i UNIKO, prof. dr. Lorenc Ekonomi, duke e vlerësuar si një moment të rëndësishëm për të nderuar jetën dhe veprën e një prej personaliteteve më të shquara të historisë shqiptare, Fan Nolit edhe në përvjetorin e 60-të të vdekjes së tij.
Gjithashtu, vlerësimet e tyre dhanë për këtë takim, si dhe për kontributin që sjellin për historiografinë shqiptare botimet e autorit Ikonomi edhe dekania e FEF, prof. as. dr. Jonela Spaho, z. Albert Rakipi, kryetar i Institutit Shqiptar për Studime Ndërkombëtare, pedagogu dr. Ilir Shyta etj.
Autori Ilir Ikonomi u është përgjigjur më pas pyetjeve të të pranishmëve, duke ndarë me ta përvojën e tij të gjatë në hulumtimin e jetës dhe veprimtarisë së Fan Nolit. Ai vuri në dukje vështirësitë dhe sfidat që ka hasur gjatë grumbullimit të materialeve historike, ndërsa shpjegoi se gjatë këtij procesi kërkimor u desh një angazhim i madh intelektual the kohor, duke u përpjekur të ofronte një pasqyrë sa më të plotë dhe objektive të jetës dhe veprës së Nolit.
Emocione i dha takimit edhe interpretimi i alumnit të UNIKO, Mari Çaçi poezi nga krijimtaria e Fan Nolit.
