Në datën 12 nëntor 2024 rektori, prof. dr. Lorenc Ekonomi priti në takim studentët pjesëmarrës në Kampionatin Botëror Ndëruniversitar që u zhvillua në Romë nga data 6-10 nëntor 2024.

Gjatë bisedës me studentët Julian Vila, Stivi Kërëku, Erkian Mançi, Danjel Ndoj, Milen Caco, Elisa Myrtollari, Livja Topi, Uibi Ahmet, Relaksa Dauti, Redia Dauti dhe pedagogët, Mariela Burda, Julian Shishi, Arjan Kostani, Pandush Tasellari, Rektori i përgëzoi për suksesin e arritur dhe trofetë që i sollën Universitetit :

“Faleminderit që na nderuat sërisht. Ju jemi mirënjohës për këto arritje dhe për përfaqësimin që po i bëni jo vetëm Universitetit dhe qytetit të Korçës, por edhe vendit tonë”. Ndërsa vlerësoi impaktin pozitiv që këta studentë po krijojnë në universitet dhe jo vetëm, theksoi se ky sukses nuk është i rastësishëm, por rezultat i një përkushtimi të vazhdueshëm nga vetë studentët, i mbështetur edhe nga angazhimi dhe bashkëpunimi i pandërprerë i pedagogëve të tyre. “Është ky bashkëpunim që nxit frymën e suksesit, i cili shtrihet përtej auditorëve dhe garave akademike. Ne si drejtues dhe pedagogët, do të ofrojmë mbështetje të vazhdueshme, duke krijuar një mjedis të përshtatshëm për studentët që të zhvillojnë potencialin e tyre maksimal në çdo drejtim”.

Gjatë takimit kryetari i Shoqatës Sportive të UNIKO, dr. Arto Adili dhe përgjegjësja e departamentit të Edukimit, dr. Albina Pajo theksuan faktin se këta studentë janë një shembull i shkëlqyer i frymës së bashkëpunimit dhe përkushtimit, të cilat jo vetëm që i bëjnë ata të suksesshëm, por edhe frymëzojnë. “Ishte një skuadër studentësh kompakte dhe bashkëpunuese, që arriti të dallonte në këtë kompeticion. Angazhimi i përbashkët, student- pedagog dëshmoi se me përkushtim, përgatitje të fortë, me seriozitet e edukatë në punë suksesi është i garantuar”.