Në datën 28 prill 2023, Fakulteti i Shkencave Natyrore dhe Shkencave Humane, Universiteti “Fan S. Noli” zhvilloi ditën e hapur me temë: “Shkencat dhe TIK” organizuar nga departamenti i Informatikës dhe departamenti i Matematikë-Fizikës, në bashkëpunim me Universitetin “Aldo Moro” të Barit, Itali dhe me Shoqatën e Teknologjisë së Informacionit të Pulias.
Fakulteti i Shkencave Natyrore dhe Shkencave Humane u dha të rinjve mundësinë që nëpërmjet një ndërveprimi virtual të njiheshin me mundësitë e shumta që ofron fusha e Teknologjisë së Informacionit dhe Komunikimit për karrierë profesionale, në një treg gjithmonë e më të integruar dhe që funksionon në ndërveprim dixhital, pavarësisht vendodhjes fizike.
Këtë veprimtari e përshëndeti prof. as. dr. Sonela Stillo, dekane e FSHNH, si dhe prefekti i Qarkut, Korçë, z. Nertil Jole, i cili përgëzoi drejtuesit e Universitetit dhe Fakultetit, veçanërisht Dekanen Stillo dhe pedagogun Rafail Prodani, për punën dhe përpjekjet inkurajuese që bëjnë, për të tërhequr interesin e të rinjve të shkollave të mesme, që ata t’i bashkohen rrugës së dijes pranë Universitetit të qytetit të tyre, por edhe për të shfrytëzuar mundësi e dritare plotësuese për trajnime, falë programeve që ofrohen si përvoja të vlefshme në shtete e qytete të tjera të Evropës.
