Në datën 29 mars 2024, Ambasadori i Republikës së Rumanisë në Shqipëri, z. Octavian Serban vizitoi Universitetin “Fan S. Noli” me rastin e 110-vjetorit të marrëdhënieve të pandërprera diplomatike midis Rumanisë dhe Shqipërisë,

Ambasadori u prit në takim nga zëvendësrektori për mësimin, dr. Arto Adili, dhe dekanët e katër fakulteteve: prof. as. dr. Gjergji Mero, prof. as. dr. Jonela Spaho, prof. as. dr. Ledina Alolli dhe prof. as. dr. Sonela Stillo.

Gjatë diskutimit për bashkëpunimin e deritanishëm të Universitetit “Fan S. Noli” me universitetet rumune, Ambasadori Șerban shprehu mbështetjen e tij për forcimin dhe zgjerimin e mëtejshëm të tij.

Gjithashtu ai theksoi edhe rolin e veçantë që luan Universiteti “Fan S. Noli” në formimin e ekspertëve, por edhe të karaktereve, personaliteteve, të cilët do t’u përcjellin brezave të ardhshëm vlerat e qytetit të Korçës dhe autenticitetin e këtij qyteti shumë të rëndësishëm për historinë e Shqipërisë, si dhe për marrëdhëniet midis Rumanisë dhe Shqipërisë.

Me këtë rast, Ambasadori dhuroi për Universitetin librin “Pavarësia e Shqipërisë në perceptimin e opinionit publik rumun” të historianit rumun prof. dr. Stoica Lascu.