3 Mars 2026- Rektori i Universitetit “Fan S. Noli”, prof. dr. Lorenc Ekonomi priti në një takim të veçantë studentët Redi Yzellari, Irini Bicka, Ester Koço, Lediana Dallo e Klaudia Koleci, si studentë që dallojnë për arritjet dhe rezultatet e larta akademike në programet e studimit “Inxhinieri Informatike” dhe “ Matematikë- Fizikë”.

Duke qenë se edhe vetë i përket fushës së Matematikës, Rektori i përgëzoi studentët për arritjet e tyre, duke ndarë me ta edhe emocionin e një pedagogu që e njeh nga afër sfidën dhe bukurinë e këtij rrugëtimi. Ai i inkurajoi të vazhdojnë të synojnë gjithmonë e më lart, duke theksuar se është përkushtimi dhe disiplina e vazhdueshme që ka sjellë këto rezultate, të cilat i nderojnë ata, Universitetin dhe vendin. Janë pikërisht këta studentë që jo me larg se disa muaj më parë janë bërë pjesë e aktiviteteve të rëndësishme kombëtare e ndërkombëtare, si Olimpiada e Matematikës për Studentët e Evropës Juglindore apo Maratona e Sigurisë Kibernetike, ku janë përballur me sfida të nivelit të lartë dhe ku kanë dalë me përfaqësime dinjitoze.

Gjithashtu, prej disa javësh këta studentë me mbështetjen e stafit akademik u përgatitën për edicionin e radhës të SEEMOUS 2026, që pritej të niste sot në Qipro, por që për shkak të situatës pjesëmarrja e tyre është e pamundur.

Vlen të theksojmë se me punë dhe përkushtim këta të rinj së bashku me studentë të tjerë që kanë zgjedhur të studiojnë në këto programe janë dëshmi e qartë se shkencat ekzakte nuk janë thjesht programe studimi, por janë guxim për të menduar ndryshe, janë përgatitje për një botë që kërkon zgjidhje, inovacion dhe mendje të mprehtë. Le të jetë ky edhe një mesazh për maturantët që pëlqejnë sfidat.