Në kuadër të ndërkombëtarizimit, Universiteti “Fan S. Noli” do të mirëpresë Olimpiadën XIX Ballkanike Studentore të Matematikës, e cila do të organizohet nga data 4 – 9 mars 2025 për herë të parë në vendin tonë, si një bashkorganizim i UNIKO dhe Shoqatës Ballkanike të Matematikës.

Kjo ngjarje e rëndësishme akademike do të bëjë bashkë mbi 100 studentë nga vende të ndryshme të Ballkanit, duke shënuar kështu edhe një nga pjesëmarrjet më të larta në historinë e saj.

Pjesëmarrës do të jenë edhe 6 studentë nga Universiteti “Fan S. Noli”, të cilët do të kenë mundësinë të konkurrojnë dhe të sfidojnë aftësitë e tyre matematikore me bashkëmoshatarë nga rajoni.

Kjo veprimtari jo vetëm promovon ekselencën akademike dhe zhvillimin e mendimit kritik, por gjithashtu kontribuon në fuqizimin e bashkëpunimit rajonal dhe ndërveprimit kulturor, ku studentët mund të ndajnë përvoja dhe të forcojnë lidhjet akademike mes tyre.

Gjatë ditëve të Olimpiadës pjesëmarrësit do të kenë mundësi të bëhen pjesë e takimeve dhe diskutimeve me pedagogë e studentë të UNIKO, ndërsa janë parashikuar edhe veprimtari shoqëruese, siç janë vizitat kulturore në muze apo në zonat turistike të qarkut të Korçës, për t`i njohur studentët me trashëgiminë kulturore të rajonit tonë.

Vlerësimi i përformancës së studentëve do të kryhet nga një juri e përbërë nga profesorë dhe ekspertë të fushës së matematikës nga Shqipëria e vende të ndryshme të Ballkanit, duke siguruar një proces vlerësimi të drejtë dhe transparent, të bazuar mbi kritere të qarta dhe metodologji bashkëkohore.

Universiteti “Fan S. Noli” e mirëpret me kënaqësi këtë ngjarje dhe iu uron suksese të gjithë pjesëmarrësve në këtë garë të nivelit të lartë.