Në datën 28 janar 2025, në kuadër të Ditës Ndërkombëtare të Ligatinave në Fakultetin e Shkencave Natyrore dhe Shkencave Humane, Universiteti “Fan S. Noli” u zhvillua një leksion i hapur me temë: “Të ruajmë Parkun Kombëtar të Prespës për një të ardhme të përbashkët”.

Ora e hapur u organizua nga departamenti i Biologji-Kimisë në bashkëpunim me organizatën mjedisore PPNEA, duke sjellë në vëmendje rëndësinë e ligatinave si ekosisteme kyçe për ruajtjen e biodiversitetit dhe përmirësimin e jetës së komuniteteve lokale.

Gjatë kësaj veprimtarie në një diskutim interaktiv u fol mbi rolin e liqeneve të Prespës, si ligatina me rëndësi të madhe ndërkufitare dhe rajonale. Ligatinat janë jo vetëm habitate për një numër të madh llojesh të rralla dhe të rrezikuara, por ky park shërben edhe si korridor ekologjik për lloje si rrëqebulli i Ballkanit apo ariu i murrmë, lloje me rëndësi gobale.

Për më tepër, ato kontribuojnë në ruajtjen e ujërave, mbrojtjen nga përmbytjet dhe ofrojnë shërbime të rëndësishme ekosistemi, të cilat përdoren edhe nga njerëzit për nevojat e tyre jetësore dhe ekonomike.

Bashkëbisedimi pati fokusin tek informimi i studentëve se si ligatinat mund të qeverisen dhe të ruhen për brezat e ardhshëm.

Ky takim ishte gjithashtu një dëshmi e bashkëpunimit mes departamentit të Biologji-Kimisë dhe PPNEA-s, të cilët kanë krijuar ura të reja bashkëpunimi për projekte dhe nisma të përbashkëta, për të cilat, angazhimi dhe përfshirja e studentëve është shumë e rëndësishme.