Në datën 20 nëntor 2024 në Ditën Ndërkombëtare të të Drejtave të Fëmijëve, Departamenti i Shkencave Sociale me studentët e programit të studimit “Administrim dhe Politika Sociale”, viti II, organizuan veprimtarinë me temë: “Të njohim të drejtat tona”, duke sjellë në vëmendje nevojën për specialistët që formohen në fushën e administrimit të politikave sociale, si dhe domosdoshmërinë e ndërveprimit institucional për të ofruar shërbime cilësore për rajonin në lidhje me edukimin, ndërgjegjësimin, promovimin dhe mbrojtjen e të drejtave të fëmijëve.

Kjo veprimtari u zhvillua në kuadër të përfshirjes dhe angazhimit të studentëve në modulin “Bazat e shërbimeve sociale”, ku ata njihen me rëndësinë e shërbimeve që do të ofrojnë nesër si specialiste të fushës në institucionet vendore dhe ato qëndrore për kategori të ndryshme shoqërore, përfshirë edhe fëmijët.

Gjatë veprimtarisë së zhvilluar me vogëlushët e një prej kopshteve të qytetit të Korçës, studentët vlerësuan faktin se njohja dhe edukimi për të drejtat nga fëmijët është një faktor kyç për parandalimin e shumë dukurive negative, të cilat mund të ndodhin në shoqërinë tonë.

E konceptuar në formën e lojërave edukative, veprimtaria u krijoi mundësinë vogëlushëve të shprehnin mendimet dhe ndjenjat e tyre, duke treguar se si e perceptojnë ata drejtësinë, barazinë dhe të drejtat që u përkasin. Kjo i ndihmoi të kuptojnë se çdo fëmijë ka të drejtë të jetojë në një mjedis të sigurt dhe të dashur.

Në përfundim, studentët ndanë përvojat e tyre, duke reflektuar mbi ndikimin që kanë specialistët e fushave të administrimit të politikave sociale në institucione dhe ndërveprimi i tyre në parandalimin e fenomeneve si dhuna, ngacmimet, diskriminimi dhe bullizimi. Ata theksuan se veprimtari të tilla i pajisin me kompetenca dhe njohuri në fushat e tyre të studimit për të ndërtuar specialistë të suksesshëm dhe të dobishëm që kontribuojnë në rajon për një shoqëri më të informuar, më të sigurt dhe më të përgjegjshme.