Në datën 30 qershor 2025 u përurua në mjediset e Fakultetit të Ekonomisë, Universiteti “Fan S. Noli”, “Laboratori i Turizmit dhe Mikpritjes”.
Ky laborator vjen si një hapësirë moderne, bashkëkohore dhe multifunksionale, i ngritur në kuadër të një bashkëfinancimi mes Universitetit “Fan S. Noli” dhe La Fondation pour la Formation Hôtelière.
Në ceremoninë e inagurimit të këtij laboratori u nënvizua fakti se, ai do të shërbejë si një platformë praktike për studentët e programeve të turizmit dhe mikpritjes dhe si një qendër trajnimi për stafet e bizneseve turistike, duke ndihmuar në zhvillimin e aftësive profesionale dhe përmirësimin e cilësisë së shërbimit në industrinë e mikpritjes.
Të pranishëm në takim ishin rektori, prof. dr. Lorenc Ekonomi dhe dekania e Fakultetit të Ekonomisë, prof. as. dr. Ledina Alolli, të cilët prenë edhe shiritin e inagurimit, si dhe të ftuar të tjerë, drejtues të UNIKO, pushteti lokal, Shkolla Profesionale Korçë, përfaqësues nga biznese turistike të rajonit të Korçës, staf akademik dhe studentë të përfshirë në programet e mikpritjes.
Koordinatorja e projektit, dr. Alma Zhilla foli në lidhje me bashkëpunimin mbi 14-vjeçar me La Fondation pour la Formation Hôtelière, si një partner i besueshëm që ka kontribuar ndër vite në forcimin e kapaciteteve profesionale në fushën e turizmit dhe hotelerisë.
Më pas, ish-studentë të departamentit Marketing-Turizëm bënë disa demonstrime praktike, që përfaqësojnë trajnimet e ardhshme që do të mbahen në këtë laborator dhe që synojnë të sjellin një qasje më realiste dhe cilësore në formimin profesional.
Një falënderim i veçantë në këtë takim shkoi për:
La Fondation pour la Formation Hôtelière, për mbështetjen financiare, besimin dhe vizionin e përbashkët
Kantinën e Verës Pelium, që kontribuoi me mikpritjen autentike në këtë ditë të veçantë,
️Shejni’s Candel Shop për dekorimin e mjedisit të laboratorit.
Ky laborator është një shembull frymëzues i bashkëpunimit institucional dhe ndërkombëtar, që mund të sjellë rezultate konkrete në shërbim të arsimit dhe zhvillimit të turizmit.
