Në datën 19 nëntor 2024 departamenti i Shkencave Sociale, Fakulteti i Shkencave të Natyrës dhe Shkencave Humane në kuadër të Ditës Ndërkombëtare të Filozofisë organizoi veprimtarinë me temë: “Dimensionet e Kantizmit dhe shoqëria postmoderne”.

Kjo veprimtari kishte qëllim të vendoste në fokus reflektimin mbi njeriun në shoqërinë e sotme dhe dinamikat e zhvillimit të tij nën ndikimin e shumë faktorëve sociale, kulturore, psikologjike, historike, ekonomike, politike etj.

Edhe këtë vit takimi u zhvillua jashtë auditorëve. Stafi dhe studentët e FSHNH ishin mes nxënësve të gjimnazit “Faik Konica” në mjediset e Kabinetit të Filozofisë.

Ata i përqëndruan diskutimet mbi njeriu, duke cituar Kantin: “Me ligj njeriu është fajtor nëse shkel të drejtat e të tjerëvë. Me etikë ai është fajtor qoftë edhe vetëm kur e mendon këtë”.

Veprimtaritë në kuadër të Ditës Ndërkombëtare të Filozofisë tashmë janë kthyer në një traditë për këtë Departament.

Bashkëbisedimi me nxënësit dhe studentët e programeve “Shkenca politike” dhe “Administrim dhe politika sociale” krijoi hapësira ndërveprimi dhe shkëmbime idesh mbi sfidat dhe mundësitë që sjell koha postmoderne, duke vendosur filozofinë kantiste në shërbim të edukimit dhe zhvillimit të mendimit kritik.