Në datën 9 prill 2025 studentë të Fakultetit të Ekonomisë, Universitetit “Fan S. Noli” morën pjesë në leksionin e hapur me temë: “Të njohim fushën e pronësisë industriale dhe të drejtat që burojnë nga regjistrimi i objekteve të saj”.

Përfaqësueset e DPPI, znj. Sonila Meka, drejtor i Koordinimit, Promovimit, Trajnimeve dhe Analizës, znj. Eneda Shiroka, përgjegjëse e Sektorit të Promovimit dhe Qendrës së Trajnimeve dhe znj. Suela Qatipi specialiste e këtij sektori dhanë një kuadër bazë të fushës, duke u ndalur në secilin objekt të pronësisë industriale konkretisht, marka tregtare, patenta për shpikje, disenjot industriale dhe tregusit gjeografikë, pa lënë mënjanë procedurën dhe rëndësinë e regjistrimit të tyre.

Në takim u trajtuan marrëdhëniet e institucionit me organizatat ndërkombetare, si dhe institucionet partnere të zinxhirit të pronësisë intelektuale në vend.

Paraprakisht ato u pritën në një takim edhe nga zëvendësretori për mësimin prof. as. dr. Lorena Zeqo dhe dekani i FE, prof. as. dr. Ledina Alolli, ku diskutuan për bashkëpunimin e deritanishëm ndërinstitucional, si dhe për zgjerimin dhe thellimin e tij.

Takime të tilla synojnë të forcojnë njohuritë dhe të rritin ndërgjegjësimin për regjistrimin dhe mbrojtjen e pronësisë industriale, duke kontribuar në zhvillimin e inovacionit dhe ekonomisë së dijes në vend.