Në datën 18 nëntor 2025 departamenti i Shkencave Sociale, FSHNH në bashkëpunim me Center For Openness And Dialogue (COD) dhe Qendrën Rinore Korçë organizuan veprimtarinë “Human –Tech-Njeriu dhe teknologjia” në kuadër të Ditës Ndërkombëtare të Filozofisë.

Në takim, ku ishin të pranishëm pedagogë, studentë dhe nxënës të gjimnazeve të qytetit të Korçës në fokus ishte diskursi filozofik postmodern mbi raportin e qenies humane me teknologjinë.

Të rinjtë u përfshinë në një diskutim të hapur mbi rolin e teknologjisë në jetën moderne dhe ndikimin e saj në të menduarin kritik dhe ndërveprimin njerëzor.

Referuesit dr. Suela Dinellari, prof. dr. Gjergji Pendavinji, dr. Eriseld Kalemaj dhe docent Ardian Matka sollën perspektiva nga filozofia ekzistenciale e Kierkegaard dhe analiza e teknologjisë nga Heidegger, duke theksuar se inteligjenca emocionale dhe shpirti njerëzor mbeten dimensione të pazëvendësueshme nga inteligjenca artificiale, pavarësisht komoditeteve që ajo ofron.

Më pas takimi vijoi me pyetje, ide mendime e argumente nga të pranishmit duke pasuruar debatin mbi marrëdhënien njeri–teknologji.