Në datën 9 mars 2026 studentët e programeve të studimit “Gjuhë dhe kulturë frënge” dhe “Gjuhë angleze” morën pjesë në një takim të veçantë me studiuesin dhe shkrimtarin francez Frédéric Baudin, i cili në një bashkëbisedim të hapur me ta trajtoi temën e ekologjisë dhe përgjegjësisë së njeriut ndaj mjedisit.

Takimi u organizua nga pedagogia e gjuhës frënge, dr. Fabiola Kadi në kuadër të pranverës frankofone.

Studiuesi ndau me studentët reflektime dhe ide mbi marrëdhënien midis njeriut dhe natyrës, duke theksuar se kujdesi për mjedisin është një sfidë globale që kërkon ndërgjegjësim, edukim dhe veprim të përbashkët. Ai theksoi se ekologjia nuk lidhet vetëm me shkencën, por edhe me kulturën, etikën dhe mënyrën se si shoqëria e kupton rolin e saj në mbrojtjen e planetit, për përdorimin e përgjegjshëm të burimeve natyrore dhe rëndësinë e edukimit për një zhvillim të qëndrueshëm.

Sipas studentëve ky takim krijoi mundësinë për të zgjeruar njohuritë e tyre jo vetëm në fushën e gjuhëve të huaja, por edhe në ndërgjegjësimin për sfidat mjedisore të kohës sonë, një nxitje për të reflektuar mbi përgjegjësinë që secili prej nesh ka për të mbrojtur dhe ruajtur natyrën për brezat e ardhshëm.