Në datën 10 shkurt 2023, dy emra të njohur të skenës dhe kinematografisë shqiptare, regjisori Leka Bungo dhe aktori Viktor Zhusti ishin sot mes studentëve të Universitetit “Fan S. Noli”. Ata u pritën në një takim të organizuar nga departamenti i Gjuhës dhe Letërsisë me pedagogë, studentë dhe maturantë të ftuar. Gjatë bisedës mes tyre u fol për artin në përgjithësi, duke u ndalur më pas në bashëpunimin e tyre më të ri: “Profesionisti”, një komedi e trishtë, vepër e dramaturgut të shquar Dushan Kovaçeviç, që trajton një nga temat më të nxehtat të shoqërisë shqiptare atë të hapjes së dosjeve të ish sigurimit, e cila do të shfaqet edhe për artëdashësit korçarë.

Tema e trajtuar ngjalli mjaft interest tek të rinjtë e pranishëm, të cilët nuk nguruan të bëjnë pyetje nga më të ndryshmet, në lidhje me shfaqjen, karrierën dhe jetën e tyre profesionale në përgjithësi. Duke iu drejtuar brezit të ri regjisori Bungo u shpreh: “Thjesht mesazhi dhe tema që kjo shfaqje trajton është shumë e përafërt me problemet e shqiptarëve sot. Një nga çështjet që autori trajton në vepër, është çështja e persekucionit të shqiptarit gjatë regjimit komunist, persekucionit në të gjitha përmasat dhe kjo është një nga temat kryesore të cilin autori me mjeshtëri e ka sjellë në këtë vepër artistike mjaft të kuptueshme për të gjithë”.